Саха тылын, литературатын уонна култууратын учууталларын 2-с Өрөспүүбүлүкэтээҕи сийиэhэ сэтинньи 22-24 күннэригэр Дьокуускай куоракка үрдүк тэрээһиннээхтик буолан ааста. Сийиэскэ Саха сирин араас муннугуттан 500тэн тахса дэлэгээт мунньуһунна. Манна үгүс үөрүүлээх көрсүһүүлэр, киэҥ ис хоһоонноох кэпсэтиилэр ыытылыннылар, сахалыы үөрэххэ саҥа аартык арыллар дьоро түмсүүтэ буолла. Бүлүү улууһуттан 17 дэлэгээт, саха тылын, алын кылаас учууталлара, оҕо уһуйаанын иитээччилэрэ, ветеран учууталлар, төрөппүт, Бүлүү улууһун үөрэҕириитин салалтатын начаалынньыга кыттыыны ыллылар.
Сийиэһи Ил Түмэн Бэрэссэдээтэлин бастакы солбуйааччы, «Саха
Өрөспүүбүлүкэтигэр тыллар тустарынан» сокуон ылыллыбыта 30 сылын бэлиэтээһини
тэрийэр хамыыһыйа бэрэссэдээтэлэ
Александр Николаевич Жирков иилээн-саҕалаан
ыытта. Тыл эппит дьон бары төрөөбүт тылы үөрэтии, сахалыы эйгэни
төрүттээһин, туох кыһалҕа баарын туһунан эттиннилэр, кэккэ боппуруостары
туруордулар. Оҕо уһуйааныттан саҕалаан оскуолаҕа саха тылын чааһыгар тиийэ
араас кыһалҕалары эттилэр.
Александр Николаевич сокуон 2 тылынан тэҥҥэ
суруллан ылыныллыахтаах диэн эттэ. Тылы сайыннарар бырагыраамаҕа 100 мөл солк
көрүллүөхтээҕин делегаттар ытыс тыаһынан биһирээтилэр. Үөрэх программата уонна
үөрэх туһунан сокуону хаттаан көрөргө үлэ барара тоҕоостооҕун ыҋдылар.
Түмүккэ,Александр Николаевич бүгүн манна этиллибит санаалар сийиэс резолюциятыгар
булгуччу киирэллэрин туруоруста.
Сийиэс чэрчитинэн ыытыллыбыт «Сыыппара үөрэҕин иитэр-үөрэтэр кэскилэ» түһүлгэҕэ А.И. Леонтьев аатынан Лөкөчөөн орто оскуолатын саха тылын, литературатын үрдүк категориялаах учуутала, РФ уопсай үөрэхтээһин бочуоттаах үлэһитэ, СӨ үөрэҕириитин туйгуна Федорова Матрена Семеновна «Саха тылын уонна литературатын үөрэтиигэ сыыппара үөрэҕин туһаныы” дакылаатынан кытынна, дьон сэҥээриитин ылла. Бүлүү куорат оскуола иннинээҕи саастаах оҕону сайыннар киин иитээччитэ Софронеева Любовь Мефодьевна “Уһуйааҥҥа сахалыы иитии эйгэтэ” диэн үлэтинэн уопут атастаста.
Түмүккэ, саха тылын уонна литературатын үөрэтии кэнсиэпсийэтин дьүүллэһэн, чопчулаан олоххо киллэрии, кыра уонна оскуола саастаах оҕолорго сахалыы эйгэни чугаһатыы, куорат эйгэтигэр төрөөбүт тылынан үөрэтии – бу барыта төрөөбүт тылынан саҥарыы, сайдыы биир сүрүн олуга буоларын, хас биирдии учуутал, төрөппүт, эдэр ыччат, оҕо өйдүөх тустаах диэн биир санааҕа кэлэн тарҕастылар.
Ольга Каратаева, Саха тылын, литературатын улуустааҕы методическай холбоһуктарын салайааччыта
