Кулун тутар 30 күнүгэр Бүлүү улууһугар Советскай Союз Геройдарын Николай Алексеевич Кондаков, Алексей Афанасьевич Миронов, Николай Саввич Степанов аатын сүгэр оскуолалар истэринэн Николай Саввич Степанов 100 сааһыгар анаан, Геройдар Албан ааттарын уйэтитиигэ, үтүө өйдөбүл, кинилэргэ махтал, ытыктабыл хаһан да уостубатын туһугар слёттара ыытылынна.
Сарсыарда Н.А. Кондаков аатынан Дьөккөн орто оскуолатыгар слёт үөрүүлээх аһыллыыта буолла. Манна үс оскуола хамаандата визиткаҕа, 1941-45 сс. сэрии кэмин ырыаларын ыллааһынтан саҕаланна. Ону тэҥэ слет кыттылаахтара Дьөккөн нэһилиэгин Кыайыы болуоссатыгар сырыттылар, нэһилиэк Чулуу дьонун историятын иһиттилэр, сэргээтилэр.
Ол кэннэ тэрээһин кыттылаахтара Бүлүү куоратыгар айаҥҥа туруннулар. Айаннаан кэлээт, Бүлүү куорат бойубуой слава музейыгар экскурсиялаатылар. Салгыы бары биир киһи курдук тутуспутунан үс үөстээх, үлүскэннээх сүүрүктээх, Урааҥхай саха уруйун туппут үүнэр сайдар кэскиллээх, эрчимнээх эдэр ыччаттардаах, Бүлүү эбэ хотун үрдүгэр, чочуллан турар, Үс Хотой — Улуу Геройдар болуоссаттарыгар Николай Алексеевич Кондаковка, Алексей Афанасьевич Мироновка, Николай Саввич Степановка, кинилэргэ сүгүрүйээри, кинилэр Албан ааттарыгар сибэкки дьөрбөтүн уурдулар.
Онтон Николай Саввич Степанов аатынан Бүлүүтээҕи үһүс нүөмэрдээх оскуолаҕа Ыстапаанаптыы уруоктарга үөрэннилэр. Оҕолор бу уруоктарга үөрэнэн Герой Николай Саввич Степанов хайдах курдук хорсунун, Ийэ Дойду иһин килбиэннээхтик киирсиһитин туһунан өссө эбии биллилэр, махталлара, сүгүрүүйэлэрэ өссө ордук күүһүрдэ. Уруоктар кэннилэриттэн оҕолор, минньигэстик аһаат, строевой хаамыыга уонна военизированнай эстафетаҕа күөн көрүстүлэр.
Ытык Бүлүү киэн туттар дьонугар, хорсун буойуннарга, Советскай Союз Геройдарыгар дьон ытыктабыла, сүгүрүйүүтэ, махтала үйэлэр тухары анана, уруйдана туруохтун!
Бүлүүтээҕи 3-с №-дээх орто оскуола пресс-киинэ
