Бүгүн оскуолабытыгар үөрүүлээх түгэн буолла! Ол курдук, быйылгы Норуоттар икки ардыларынааҕы Аармыйа оонньууларын чемпиона, оскуолабыт выпускнига Семен Кулебякин ыалдьыттаата. Семен оҕолорго күрэхтэһии хайдах барбытын, тоҕо контрактнай сулууспаны талбытын кэпсээтэ, оҕолор ыйытыыларыгар хоруйдаата. Кини улахан ситиһиитинэн үөрэппит учууталларыгар махтанна уонна инникитин кадеттары армияҕа сулууспалыырга, байыаннай үөрэҕи талалларыгар баҕа санаатын эттэ.
Көрсүһүүбүтүгэр Өкүндү нэһилиэгин баһылыга Никифор Владимирович ПЕТРОВ барҕа махтал тылларын анаан туран грамота, харчынан сертификат уонна военкомат грамотатын, улуус дьаһалтатын аатыттан спортка комитет председателэ Гаврил Степанович Евсеев улуус баһылыгын, спорт управлениетын грамоталарын, опека отделыттан Катерина Ефимовна Бакарова махтал суруктары туттардылар. Барҕа махтал тыл ананна Семены ииттэ ылбыт Любовь Владимировна уонна Виктор Иванович Константиновтарга, кырдьык кинилэр үтүөлэринэн, иитиилэринэн бу улахан ситиһии кэллэҕэ. Уолбутугар өссө төгүл үрдүкү ситиһиилэри баҕарабыт!
Борис Васильев, Өкүндү оскуолатын
директорын иитэр үлэҕэ солбуйааччы
