Олунньу 6-13 күннэригэр «Ийэ тыл уонна сурук-бичик» күнүгэр аналлаах нэдиэлэ Бүлүү улууһун үөрэх тэрилтэлэригэр үрдүк таһымнаахтык ааста.
Олунньу 6-8 күннэригэр Олоҥхо дьиэтигэр «Эһээ, эбээ сэһэнэ» диэн тэрээһиҥҥэ куорат кырдьаҕастара оскуола оҕолоругар улууспут былыргы сэһэннэрин, номохторун кэпсээтилэр. Сахалыы тыл оонньуутун, таабырын таайсыытын сатабыллаахтык ыыттылар. Кыайыылаахтарга бэйэлэрин бэлэхтэрин утары уунаннар оҕолору үөртүлэр.
Олунньу 9 күнүгэр улуустааҕы «Өбүгэм сэһэнэ» күрэххэ 20-тэ тахса оҕо кытынна. Күрэх сүрүн ирдэбилэ – оҕолор бэйэлэрэ аймахтарын, дойдуларын, нэһилиэктэрин сэһэнин, үһүйээнин уус-ураннык кэпсииргэ илин былдьастылар.
Оскуолаларга 13-кэ өрөгөйдөөх линейкалар үрдүк тэрээһиннээхтик ыытылыннылар. Холобур, Бүлүү гимназията Олоҥхо дьиэтигэр ыраастаныы, алгыс сиэрин-туомун ыллылар, түмсүүлээх оһуохайга киирдилэр, сахалыы сценка туруордулар. Бу күн бары оскуолаларга тыл оонньуута, сахалыы диктант, өйтөн суруйуу түмүгэ, сахалыы КВН ыытыллан элбэх оҕону хапта.
Норуот маастардарын оскуолаҕа ыҥыран, маастар-кылаастары ыыттардылар.
Олохтоох автор Г. Алексеева — Сайылык Кыыһа кинигэтин сүрэхтэниитигэр Киин библиотекаҕа оҕолор кытыннылар, хоһооннорун үрдүк таһымнаахтык аахтылар.
«Алгыс» сынньалаҥ киинигэр олохтоох автордар хоһооннорун ааҕыыга үгүс оскуолалар көхтөөхтүк кытыннылар. Улууспут хоһоонньуттарын сэргээн ааҕалларын көрдөрдүлэр.
Ийэ тылга сүгүрүйүү нэдиэлэнэн эрэ мунурдаммакка, ыйы быһа ситимнээхтик ыытылла турар.
Томская В.П., улуустааҕы
саха тылын учууталларын
методическай холбоһугун салайааччыта.
