Бүлүү улуустарын үѳрэҕириитин ХХХ спартакиадата 2018 с. Үѳһээ Бүлүүгэ буолбута. Араас биричиинэлэринэн биэс сыллаах тохтобул кэннэ ХХХI спартакиада 2023 с. муус устар 15 күнүгэр Бүлүү улуууһугар ыытылынна.
Уопсайа 160-ча спортсмен 4 улуустан мустан спорт 8 кѳрүҥүгэр илин-кэлин түһүстулэр. 9-10 чааска дылы регистрация кэнниттэн спартакиада үѳрүүлээх аһыллыытыгар улууспут аҕа баһылыга Винокуров С.Н., баһылыгы солбуйааччы Прокопьев А.А. кэлэн кыттыыны ыллылар. «Алмазик» уһуйаан үлэһиттэрин хора бырааһынньыгы олус киэргэттэ. Бүлүү улууһун үѳрэҕириитин түмсүүтүн председателэ Семенов С.С. Россияҕа «Учуутал уонна наставник» сыла биллэриллибитинэн сибээстээн профсоюз ветеран спортсменнарыгар Корякин А.В. (Бүлүү гимназията), Павлова А.В. (Тоҕус оскуолата) Саха Сирин профсоюһун Федерациятын Грамоталарын уонна бэлэхтэри туттарда.
Күрэхтэһиилэр тута биэс площадканан бары тэҥҥэ саҕаланнылар. Манна санатан эттэххэ, күрэхтэһии ыытар элбэх обьект баара отой сынньалаҥы үѳскэттэ. Күрэх 5 чааска дылы тохтобула суох барда. Аан маҥнай саанан ытыыга Үѳһээ Бүлүү бастаан кыайыы ѳрѳгѳйүн билэн үѳрдэ-кѳттѳ, онтон салгыы олохтоох хамаанда утуу-субуу биэс кѳрүҥҥэ бастаан (шахмат, теннис, хабылык-хаамыска, оҕунан ытыы уонна кыргыттар волейболлара) эрэллээхтик бастакы миэстэҕэ таҕыста. Ким иккис буоларын уолаттар волейболлара быһаарда. Ол курдук, Сунтаар уолаттара Үѳһээ Бүлүүлэри кыайан, бастааннар, уопсай түмүккэ иккис буоллулар. Ытыыга бастаабыт Үѳһээ Бүлүүлэр атын кѳрүҥнэргэ наар иккис-үһүс миэстэҕэ тахсаннар, үһүс бочуоттаах миэстэҕэ таҕыстылар.
Курэхтэһиини үѳрүүлээх түмүктээһин кэннэ Бүлүү куоратын уһуйааннара, алын сүһүѳх оскуолата уонна профсоюз президиума тэрийбит сахалыы астаах баай остуола кэлбит ыалдьыттарбытын барыларын күндүлээн, «Айылгы» ансамбль (сал. Варламова С.М.) ырыанан-тойугунан эҕэрдэлээн, ыраах суолларыгар атаардыбыт. Ыалдьыттарбыт күрэхтэһии тэрээһинэ үрдүк таһымнаахтык барбытын бэлиэтээн аныгыс кѳрсүѳххэ дылы диэн тарҕастылар.
Түгэнинэн туһанан, спартакиада тэрээһинигэр кыттыбыт дьоммор барыларыгар, чуолаан ДЮСШ директорыгар Осипов Г.Д,, ВНОШ №1 директорыгар Кривошапкин И.П. улахан махталбын тиэрдэбин.
Председатель Семенов С.С.
