Оскуола үлэтигэр улахан сабыдыалы төрөппүт ылар. Төрөппүт сылаас сыһыаныттан, кыһамньытыттан үөрэнээччилэр ситиһиилэрэ тутулуктаах. Учууталтан – оҕо билиитэ, инники идэтин талыыта. Төрөппүт – учуутал, бу икки киһиттэн оҕо сайдыыта, эйгэҕэ туруктаах сылдьыыта тэриллэр. Ийэ оҕо иитиитигэр сүрүн оруолу ылар.
Афанасий Иванович Леонтьев аатынан Лөкөчөөн орто оскуолатын үөрэтэр-иитэр үлэтигэр биһиги ийэлэрбит улахан күүс-көмө буолаллар. Хас биирдии улахан тэрээһин кинилэрэ суох сатаммат. Холобурдаан аҕаллахха: “Кыайыыны уруйдуубут” кылаас ийэлэрэ кыттыылаах байыаннай-патриотическай ырыа күрэх ыытыллыбыта, үүнэр көлүөнэҕэ Улуу Кыайыы суолтатын иҥэрэр сыаллаах үчүгэй тэрээһин ааспыта. “Чэгиэн ийэлэр” – чэбдигирдэр тэрээһин, оскуола ийэлэрин успуорт саалатыгар ыҥыран оҕолор ийэлигэр фитнес сэрээккэ оҥотторбуттара, сүүрүүлээх-көтүүлээх оонньуу ыыппыттара. Маннык тэрээһиннэр оҕону бэйэтин доруобуйатын көрүнэригэр иитэллэр. “Үҥкүүлүөх!” – алын кылаас иһинэн оҕо ийэтинээн араас омук үҥкүүтүн күрэҕэ ыытыллыбыта. Хас биирдии кыттааччы үҥкүү таҥаһын тигэн, дьиэлигэр бэлэмнэнэн, биир чаҕылхай тэрээһин буолбута. Оҕону көхтөөх буоларга, сыанаҕа тахса үөрэтэргэ бэртээхэй холобур буолар.
2022 сылга Саха сирэ 100 сыллаах үбүлүөйүгэр бэлэмнэнэн төрөппүт комитетын көҕүлээһининэн хас биирдии кылааһынан сахалыы таҥас тигиитин саҕалаан эрэллэр. Сылын аайы оскуола үөрэнээччитин көстүүмүн Тольятти куораттыттан сакаастаан, оҕолорбут бары тэҥ форма кэтэллэр. Син-Хой С. С. кылааһын ийэлэрин көҕүлээһининэн хас биирдии кылаас бэйэтэ биир өҥнөөх футболкалаах. Араас успуорт тэрээһиннэргэ мэлдьи кэтэбит. 2021 с. сааһыгар алын кылаас ийэлэрэ “Төрөппүт — оҕоҕо” акциянан суол бэлиэлэрин таҥаска тигэн, кэтэр накидка бэлэхтээбиттэрэ. Оҕолорбут кыра эрдэхтэриттэн суол быраабылатын билэ улааталларыгар төһүү күүс буолуоҕа.
Оскуола кэллэктиибин өттүттэн төрөппүттэргэ оҕону иитиигэ араас сүбэлэр, кылаас мунньахтара тиһигин быспакка ыытыллаллар. Төрөппүт оскуоланы кытта ыкса сибээстээхтик үлэлээтэҕинэ, барыта кыаллар уонна сатанар.
Саха сирин Ийэлэрин күнүнэн күндү оскуолабыт ийэлэрин эҕэрдэлиибит. Эһиги сылаас илиигитинэн ас астаан дьиэ кэргэҥҥитин аһатан, оҕолоргутун бүөбэйдээн улаатыннаран киһилии киһи буолалларыгар улахан тирэх буолаҕыт. Куруук иэримэ дьиэҕит сылаас-сырдык, чэгиэн доруобуйалаах, чөл олохтоох уонна дьоллоох буолуҥ!
Мария Малышева,
А. И. Леонтьев аатынан Лөкөчөөн орто оскуолатын
дириэктэри иитэр үлэҕэ солбуйааччы
dav
