“Ийэ дьоло оҕолоругар”

Бу күннэргэ Саха сиригэр ийэлэр күннэрин бэлиэтиибит, ол курдук, үлэбинэн алтыһар биир олус кэрэ дууһалаах көхтөөх ийэни кытары билиһиннэриэхпин баҕарабын. Кини олоҥхо аргыстаах Сунтаар улууһун Аллыҥатыттан төрүттээх Бүлүү кийиитэ Сардана Петровна Томская буолар.

Томскайдар дьиэ кэргэн 9 оҕолоохтор, сүөһү иитиитинэн дьарыктаналлар, дьоҕурдаах убаастанар дьиэ кэргэн буолар. Ийэ буолар дьолун биллэрбит бастакы оҕото Петя техниканы баһылаабыт, УАЗик эбэтэр тыраахтар кини көрүүтэ-истиитэ суох табыллыбаттар, дьонугар көмөлөһөн сылгылары көрөр. Улахан кыыһа Дарья Соҕуруулуу-арҕааҥҥы государственнай университеты бүтэрэн айар дьоҕурдаах (архитектор идэлээх худуоһунньук, иистэнньэҥ, дизайнер, флорист уо д.а.) уол оҕолоох эдэр ыал хаһаайката. Андрей диэн иккис уола повар идэлээх, Покровскайдааҕы остолобуой сэбиэдиссэйэ, ыал, икки кыыс оҕолоох. Иккис кыыһа Мария Намнааҕы педколледжы бүтэрэн педагог идэлээх, икки кыыс оҕолоох эдэр ыал. Эриэккэс ааттаах орто кыыс Ольга-Харман-Далан Арктикатааҕы государственнай агро-техническай университет устудьуона, зоотехник идэтин баһылаары сылдьар, буулдьанан ытыыга спорт маастара. Г. С. Донской аатынан Бүлүүтээҕи 2-с №-дээх орто оскуола 11 кылааһын үөрэнээччитэ Лена – оскуола оҕолорун сэбиэтин президенэ, СР буулдьанан ытыыга спорт маастара, Россия спорт маастарын кандидата, быйылгы Манчаары оонньууларыгар ситиһиилээхтик кыттыбыта. Сэттис кылаас үөрэнээччитэ Меркурий ытыыга 3 разрядтаах спортсмен, ЦНТУ ситиһиилээх үөрэнээччитэ, ытыыга эмиэ үгүс ситиһиилэрдээх. Кыра кыыс Настя 6-с кылаас үөрэнээччитэ, үгүс уруһуй куонкурустарыгар миэстэлэһэр, быйыл «Моя фантазия» диэн персональнай быыстапката тэриллибитэ. Мурун бүөтэ Олимпий иккис кылаас үөрэнээччитэ, уруһуйдуурун уонна ону-маны оҥорорун сөбүлүүр. Сардана Петровна оҕолоро хас биирдиилэрэ талааннаах, айар дьоҕурдаах оҕолор. Кыра эрдэхтэринэ дьиэ, от үлэтигэр миккиллэн иитиллибит буоланнар, билиҥҥи олох ирдэбилигэр сөп түбэһэр инники күөҥҥэ сылдьар ыччаттар. Бары биһиги оскуолабытыгар үөрэммиттэрэ уонна үөрэнэллэр.

Сардана Петровна төрөппүттэргэ сүбэлиир санаалара: “Сарсыарда эһиги уһуктаҕыт, күн тыгар? Сорохтор уһуктуохтара суоҕа дии… Толкуйдаан көрүҥ диибин. Ээ, чахчы да оннук эбит дии! – диэн хардараллар. Эһиги оҕоҕут үөрэнэр, үөрэр-көтөр, ыалдьыбат, икки-үс сыана да ылан аҕалар, сыыһалаах да буоллун, ол эрэн кини үөрэнэн билии ылар. Саха литературатыттан Амма Аччыгыйа үтүөҕэ үөрэтэр айымньыларын ааҕыҥ, оҕоҕо иһитиннэриҥ. Холобура, бэйэм оҕолорбор ааҕан саҕалыыбын, онтон тугу эрэ гынардаахпын диэн аралдьыйабын. Онно биир күн кэтэһэллэр, иккис күн кэтэһэллэр иллэҥсийбэппин, үһүс күнүгэр бэйэлэрэ ааҕан киирэн бараллар. Арай оҕолорум кэлэн учуутал мөхтө, саҥарда диэтэхтэринэ хардам: — Учуутал эмиэ киһи, дьиэ кэргэннээх, кини эмиэ оҕолордоох, кини эмиэ ас астыан наада оҕолоругар. Эһиги баран астыыгыт дуо? Көмөлөһүөххүтүн баҕараҕыт дуо? – диибин, ону саҥарбаттар. Бэйэҕит сыыһаҕытын бэйэҕит булунуҥ! – диибин. Төрөппүккэ саамай ыарахана бэйэтин сыыһатын билинии буолар эбит. Кэлин өйдөөммүн билигин сыыһа гыннахпына, бырастыы гыныҥ диэн көрдөһөбүн. Оскуоланы кытта төрөппүт, дьиэ кэргэн бииргэ үлэлээтэҕинэ оҕолор бэйэлэригэр эрэллээх, ситиһиилээх буолуохтара дии саныыбын”. Оскуолаҕа төрөппүттэри кытта үлэбитигэр аһаҕас уруоктары, маастар-кылаастары ыытаары Сардана Петровнаттан сүбэлэттэрэбит, төрөппүттэри була охсон тэрийэргэ көмөлөһөр. Ону тэҥэ араас көмө акцияларга көхтөөхтүк кыттар, профориентационнай экскурсиялары тэрийсэр. Оскуоланы кытта ыкса сибээстээх, ыытыллар-тэриллэр   тэрээһиннэргэ мэлдьитин кыттар.

 

Нюргуяна Иванова, Г. С. Донской

аатынан Бүлүүтээҕи 2-с №-дээх орто оскуола учуутала.

Комментарии закрыты