Кулун тутар 12 күнүгэр Бүлүү куоратыгар ыытыллыбыт робототехника «Деталька-2020» региональнай куоталаһыытыгар Сунтаартан – 28, Ньурбаттан – 17, Үөһээ Бүлүүттэн – 18, Бүлүү улууһуттан 30 кырачаан кэлэн күрэхтэстилэр. Биэһиттэн сэттэтигэр диэри саастаах уһуйаан 90-ча иитиллээччитэ билиитин-көрүүтүн, сатабылын, мындыр толкуйун көрдөрдө. Аныгы үйэ сонун куоталаһыыта оскуолаҕа киириэн иннинээҕи саастаах оҕолору иитии, үөрэтии салаата төрүттэммитэ 100 сылыгар ананан ыытылынна.
Бүлүү бөлөх улуустарын оҕо уһуйааннарын иитиллээччилэрин робототехникаҕа куоталаһыыларын үөрүүлээхтик арыйыы Бэстээҕи арочнай саалаҕа ыытылынна. Кырачаан оҕолору төрөппүттэрэ, педагогтар, иитээччилэр ыраах айаҥҥа бэйэлэрэ көрөн-истэн, тэрээһиннээхтик аҕалбыттарын бэлиэтиэххэ наада. Тэрийээччилэр сааланы бырааһынньыктыы киэргэтэн, истиҥ-сылаас эйгэни олохтообуттара кыракый кыттааччылар уонна кэлбит дьон сүргэлэрин көтөхтө.
«Биһикчээн» оҕо уһуйаанын сахалыы мааны таҥастаах уолаттара барабааҥҥа оонньоон истиҥ эҕэрдэлэрин тириэртилэр, оттон кэрэчээн кыргыттар ырыаларын бэлэхтээтилэр. Ити курдук кырачаан иитиллээччилэр толоруулара мустубут дьон болҕомтотун тарта.
Салгыы Дьокуускайтан кэлбит куоталаһыы кылаабынай судьуйата О.С.Петрова уонна кыттар хамаандалартан биирдии оҕо тахсан, куоталаһыы былааҕын үөһэ күөрэччи таһаардылар. Кырачааннарга робототехника куоталаһыыта саҕаламмытынан эҕэрдэ тылы эттилэр: улуустааҕы үөрэх салаатын начальнига Н.М.Семенова, IT сайдыытын өрөспүүбүлүкэтээҕи Ассоциациятын бэрэссэдээтэлэ М.В. Стручков, куоталаһыы кылаабынай судьуйата О.С.Петрова.
Робототехникаҕа куоталаһыы маннык көрүҥнэринэн барда: робофутбол, боулинг, баскетбол, «Миссия для дошкольников», «Переработка отходов», «Творческая категория». Хас биирдии көрүҥҥэ судьуйаларынан үлэлээтилэр: робофутболга Үөһээ Бүлүүтээҕи оҕо технопааркатыттан Нь.Е.Спиридонов, «Миссия для дошкольников» ЦНТТУ эбии үөрэхтээһиҥҥэ педагога А.А.Иванов, «Переработка отходов» «Кэскил» ИТЦ «Юный программист» куруһуогун салайааччыта С.Н.Бандерова, «Творческая категория» улуустааҕы үөрэх салаатын кылаабынай специалиһа В.В.Тетелева, баскетболга «Кэскил» ИТЦ «Робототехника» куруһуогун салайааччыта А.Р.Васильева, боулиҥҥа БПК устудьуона С.А.Протопопов.
Бу улахан региональнай куоталаһыыны М.Г. Гаврильева сэбиэдиссэйдээх «Аленушка» оҕо уһуйаанын коллектива уонна төрөппүттэрэ ис сүрэхтэриттэн кыһанан тэрийбиттэрин бэлиэтиэххэ наада.
«Деталька-2020» куоталаһыы түмүгүнэн саҥа көрүҥнэргэ: боулиҥҥа кыттааччы аҕыйах да буоллар, кыайыылаахтарынан Сунтаартан Костя Попов, Үөһээ Бүлүүттэн Слава Ким таҕыстылар. Баскетболга кыайыылаахтарынан Ньурбаттан Сахаян Афанасьев уонна Бүлүүттэн Максим Тоскин ааттаннылар. Дьүүллүүр сүбэ быһаарыытынан, куоталаһыы саамай кыра саастаах кыттааччытынан «Аленушка» оҕо уһуйаанын иитиллээччитэ Антон Федоров буолла. Итини сэргэ «Кыайыыга дьулуурун иһин» анал номинацияны ыллылар: Үөһээ Бүлүүттэн Айтал Иванов, Сунтаартан Андриан Николаев, Ньурбаттан Сайдам Назаров уонна Сардаана Попова, Бүлүүттэн Владик Иванов уонна Аян Амонов.Бүлүү бөлөх улуустарыгар абсолютнай 85 уонна 75 баалы ылбыт оҕолорунан буоллулар: Диана Матвеева (Ньурба), Никита Чертков, Ганя Филиппов (Бүлүү).
«Переработка отходов» – кыайыылаахтара Максим Уваров, Олимпий Томскай. Робофутболга «Лучший нападающий» Миша Петров, «Лучший защитник» Денис Местников бэлиэтэннилэр. Хамаанданан бастакы миэстэни «Сказка» оҕо саада ылла (Үөһээ Бүлүү), бастыҥ тренеринэн Л.П.Иванова ааттанна.
Сылын аайы бэриллэр «Надежда Вилюя» номинацияҕа Сунтаартан Одун Корнилов, Үөһээ Бүлүүттэн Саша Семенов, Ньурбаттан Олимпий Алексеев, Бүлүүттэн Ганя Филиппов тигистилэр.
«Лидер педагог» аатын ылбыт үлэһиттэргэ Бочуотунай грамоталар, Махтал суруктар туттарылыннылар. Итини сэргэ «Деталька-2020» региональнай куоталаһыыны үчүгэйдик тэрийэн ыыппытын иһин «Аленушка» оҕо саада (сэбиэдиссэй М.Г.Гаврильева) 10 тыһ. солк. сууммалаах сертификатынан наҕараадаланна. Оскуолаҕа киириэн иннинээҕи үөрэхтээһин отделын салайааччыта Л.Д.Шамаева кыттыбыт оҕолорго сертификаттары туттарда.
Куоталаһыы сабыллыытын «Веселые нотки» оҕо саадын иитиллээччилэрэ бальнай үҥкүүнэн түмүктээтилэр.
Кэлэр өттүгэр робототехника олоххо-дьаһахха улахан быһаарар күүс-көмө буоларынан, билиҥҥи кэмҥэ оскуолаҕа киириэн иннинээҕи саастаах оҕолор робототехника төрүттэрин үөрэтэр кыахтаммыттарын маннык «Деталька» куоталаһыылар арылхайдык көрдөрөллөр.
Николай Федоров.
