Сааһыран истэх аайы киһи доруобуйатын туруга мѳлтѳѳн, айгыраан иһэр. Онон сотору-сотору эмтэнэр, сынньанар олохпут ирдэбилэ курдук буолан иһэр.
Быйыл Бүлүүгэ маҥнайгы оскуола арыллыбыта 190 сыллаах үбүлүѳйүн кѳрсѳ, улууспутугар араас тэрээһиннэр биир ситиминэн сиэттэрэн тэриллэн эрэллэр. Олортон биир саамай истиҥ, сонун хайысха «Опыт поколения» диэн ааттаах, саастаах дьоҥҥо туһуламмыт бырайыак буолла.
ϴр сылларга бэриниилээхтик үлэлээбит педагогтары улуустааҕы үѳрэх управлениета үбүлээн, 19 ветеран учууталы Дьокуускай куоракка «Сосновый бор» профилакторийга биир нэдиэлэ буор босхо сынньатта. Ону таһынан, такси сыанатын биир хайысхатын эмиэ тѳлѳѳтүлэр.
Профилакторийга киирбит бастакы күммүтүттэн, быраас ыйыытынан араас процедуралары саҕалаатыбыт. Сорохтор урут билбэтэх галокамера, гальваническай ванна, прессотерапия диэн процедуралары ылан, доруобуйабытын бѳҕѳргѳттүбүт.
Күннэтэ эбиэттэн киэһэ араас кружоктар үлэлээтилэр, онно вожатайбыт Валерия батыһыннара сырытта. Ким ыллаата, ким уруһуйдаата, английскай тылга, компьютернай графикага үѳрэннэ.
Икки күн устата «Үһүс кѳлүѳнэ» оскуола үлэһиттэрэ кэлэн, су-джок, кѳннѳрү массаж кистэлэҥнэрин кѳрдѳрдүлэр, үҥкүүгэ үѳрэттилэр.
Бириэмэ булбуттар «Исцеление духа и тела по методу Сильва» диэн невролог быраас Любовь Ефимова лекциятын иһиттилэр.
ϴссѳ бу программабыт иһинэн араас специалистар: невролог, окулист, лор, гинеколог, сурдолог кэлэн кѳрѳн, УЗИ-га, ЭКГ-га түһэрэн доруобуйабыт туругун быһаардылар.
Маннык улахан болҕомто уурбуттара киһини астыннарар.
Эмтэнэртэн эрэ буолбакка, бэйэбит саастыылахтарбытын кытта алтыһан, күлэн-оонньоон эдэр сааспытын эргиттибит.
Бу үтүѳкэн бырайыак тохтообокко ѳссѳ да ѳр үлэлээн, элбэх киһи биһиги курдук астына сынньанан, эмтэнэн чѳл туруктаналлара буоллар диэн баҕа санаалаахпыт.
Учуутал үлэтэ ыарахан, киһиттэн улахан интеллектуальнай, эмоциональнай күүркэйиини ирдиир. Онон кэмиттэн кэмигэр сынньанара, учуутал барахсан туругун тупсарара хайаан да наада. Коллегаларын болҕомторолорун, ѳйѳбүллэрин сааһырбыт киһи ордук уйаҕастык, ис сүрэҕиттэн үѳрэн, долгуйан ылынар эбит…
Маннык үтүѳ сынньаланы бэлэхтээбит Бүлүү улууһун үѳрэҕин управлениетыгар, чуолаан начальник Н.М. Семеноваҕа, профком председателя П.С. Томскаяҕа уонна гимназия 2006 сыллаах выпускнигар Ю.И. Семеновка уонна оскуолабыт директордарыгар, детсадпыт сэбиэдиссэйдэригэр барҕа махталбытын этэбит. Биһиги махталбыт эһиэхэ хас да тѳгүл үтүѳнэн эргийдин!
Томская Вера Петровна, педагогическай үлэ ветерана
