1 Күүлэккэ семинар-практикум буолан ааста

Ахсынньы ый 13 күнүгэр 1 Күүлэт «Хатыҥчаан» уһуйааммытыгар «Развитие профессиональной компетентности работников ДОУ» темаҕа олус интэриэһинэй улуустааҕы семинар-практикум буолан ааста. Ыаллыы сытар нэһилиэктэрбититтэн: Үгүлээттэн «Тугутчаан», Тылгыныттан «Күнчээн», 2-с Күүлэттэн «Антошка» уһуйааннартан коллегаларбыт кэлэннэр күндү истээччи, көрдөөх кыттааччы буоллулар.     Уонна улуустааҕы үөрэх салалтатын оскуола иннинээҕи саастаах оҕолору иитии-үөрэтии салаатын начальнига Шамаева Л.Д., Бүлүү куоратын «Аленушка» уһуйаан сэбиэдиссэйэ Гаврильева М.Г., Бүлүү куоратын «Кустук» уһуйаан сэбиэдиссэйэ Кононова М.В., Бүлүү куоратын «Куобахчаан» уһуйаан сэбиэдиссэйэ Иванова С.Н. тахсаннар күн бастакы аҥаарыгар методическай көмө оҥорон, олус наадалаах информация тиэрдэннэр, семинарбытын үрдүк таһымҥа таһаардылар.

Ол кэннэ бииргэ үлэлиир коллегабыт В. И. Лобашева «Таал-таал эмээхсин» диэн оҕолору сайыннарар сорудахтаах авторскай кинигэтин билиһиннэрдэ. Түмүгэр кинигэтин бэлэхтээн семинар кыттыылаахтарыгар сюрприз оҥордо.

Күн иккис аҥаарыгар «Призвание любить» тиэмэҕэ түөртүү киһилээх (2 иитээччи, 2 иитээччи көмөлөһөөччүтэ) 3 түһүмэхтээх уһуйааннар икки ардыларыгар күрэх ыытылынна.   Үһүс түһүмэххэ иитээччилэрбит уран тарбахтарынан тиэмэҕэ оҥорбут оҥоһуктарын көрдөрөн, мастер-класс ыытаннар, күммүтүн олус киэргэттилэр.

Иванова С.Н. бэрэсэдээтэллээх жюри күрэх түмүгүн таһаарда. Ол курдук, бастакы миэстэни биьиги «Хатыҥчаан» уһуйааммыт хамаандата ылан, үөрүүбүт үксээтэ. Иккис миэстэни Тылгыны «Кунчээн» уһуйаана уонна Үгулээт «Тугутчаан» уһуйаана үллэһиннилэр. Үһүс миэстэни ылла 2-с Күүлэт «Антошка» уһуйаана ылла.

Жюри түмүгү таһаарар кэмигэр хамаандалар икки ардыларыгар «Игры по станциям» оонньуу ыытылынна.

Күммүтүн ылбаҕай ырыа аргыстаах, минньигэс астаах фуршет остуолунан түмүктээтибит.

Махтал истиҥ тылларын, эҕэрдэ кэрэтин, баҕа санаа бастыҥын тиэрдиһэн, өссө да көрсүһүөх буолан, үөрэ-көтө тарҕастыбыт.

«Хатыҥчаан» уһуйаан коллективын аатыттан бука барыгытыгар махтанан туран, сыралаах түбүктээх үлэҕитигэр үрдүктэн үрдүк ситиһиилэри, кытаанах доруобуйаны, дьолу-саргыны баҕарабыт.

 

Степанова А.Л.,

«Хатыҥчаан» уһуйаан улахан бөлөх иитээччитэ

Комментарии закрыты