«Народный учитель в сердцах вилюйчан» кинигэ сүрэхтэннэ

Сэтинньи 15 күнэ, 2018 с. «Кэскил» интеллектуальнай кииҥҥэ ССРС норуодунай учуутала М.А. Алексеев туһунан «Народный учитель в сердцах вилюйчан» диэн кинигэ сүрэхтэниитэ ыытылынна.

Холлга М.А. Алексеев туһунан Донской Г.С. аатынан үөрэҕирии музейа уонна М.А. Алексеев аатын сүгэр Баппаҕаайы оскуолата олус кэрэхсэбиллээх быыстапка тэрийбиттэр.

Михаил Андреевич Алексеев саха омуга сайдыылаах, үрдүк техническэй билиилээх буоларын туһугар бүтүн олоҕун анаабыт, элбэх, аан дойдуга тиийэ биллиилээх, учуонайдары иитэн таһаарбыт, научнай-техническэй интеллигенцияны үөскэтиигэ өлбөт-сүппэт үтүөлээх, саха норуотун интеллектуальнай күүстэрэ уһуктуутугар быһаарыылаах оруолу оонньообут киһи буолар.

Бу күн «Народный учитель в сердцах вилюйчан» кинигэни сүрэхтээһиҥҥэ кинини кытта алтыспыт дьон, үрэнээччилэрэ уонна сүгүрүйээччилэрэ кэлэн, учуутал олоҕун, үлэтин туһунан ахтан-санаан аастылар.

Кинигэ сүрэхтэниитигэр Михаил Андреевич туһунан үгүс үтүө тыл этилиннэ. Кини туһунан ыстатыйалары, матырыйааллары түмэн, сааһылаан, дьоҥҥо-сэргэҕэ кэрэхсэтэр кинигэни хомуйан таһаарбыт Венера Федоровна Тихонова, Дмитрий Тарасович Иванов кинигэ тахсарыгар күүс-көмө буолбут дьоҥҥо махтаннылар. Кинигэ туһунан түмэн көрүүнү оҥордо Тааһаҕар орто оскуолатын педагог-библиотекара Поскачина Мария Васильевна.

Эҕэрдэ тылы «Бүлүү улууһа” муниципальнай тэриллии баһылыга Сергей Николаевич Винокуров, Бүлүү улууһунааҕы үөрэҕирии салалтатын начальнига Наталья Михайловна Семенова, Бүлүү улууһун үөрэҕирии үлэһиттэрин идэлээх түмсүүлэрин салайааччыта Пелагея Семеновна Томская, “Баппаҕаайы нэһилиэгэ” муниципальнай тэриллии баһылыга Егор Афанасьевич Николаев уо.д.а. эттилэр.

Ыаллыы сытар Үөһээ Бүлүү улууһуттан 8 киһилээх делегация кэлэн ыалдьыыттаата.

Тэрээһин норуодунай учуутал Михаил Андреевич Алексеев скверигэр сибэкки дьөрбөтүн ууруунан түмүктэннэ.

Комментарии закрыты