Ыам ыйын 5 күнэ – ССРС Народнай учуутала, РСФСР уонна Саха АССР үтүөлээх учуутала, Аҕа дойду Улуу сэриитин кыттыылааҕа Михаил Андреевич Алексеев төрөөбүт күнэ.
Кырдьаҕас Бүлүү куоратын саамай килбэйэр киинигэр улуус үөрэҕин үлэһиттэрин үптэринэн тутуллан, 2016 сыллаахха алтынньы 7 күнүгэр арыллыбыт ССРС Народнай учуутала М.А.Алексеев скверигэр кини төрөөбүтэ 101 сылын бэлиэтээн, сүдү киһилэрин, Улахан Учууталларын ахтан-санаан аастылар. Ол курдук хаардаах-тыаллаах, тымныы күнү аахсыбакка, сквергэ Михаил Андреевич үөрэнээччилэрэ, оскуола оҕолоро, учууталлар уонна куорат олохтоохторо кини үтүө аатыгар сүгүрүйэ, махтана муһуннулар.
Улуус баһылыга С.Н.Винокуров, Бүлүү куоратын депутаттарын Сэбиэтин бэрэссэдээтэлэ С.М.Саввинова, үөрэх управлениетын начальнига Н.М.Семенова, үөрэҕирии бочуоттаах олохтооҕо И.И.Потапова, Михаил Андреевич үөрэнээччилэрэ Д.Т.Иванов, А.В.Слепцова тыл эттилэр, Михаил Андреевич саха ыччатыгар физика, математика курдук уустук предметтэри дириҥэтэн үөрэтэр уонна техническэй билиини биэрэр бастакы физмат оскуоланы Саха сиригэр төрүттээбитин, Бүтүн Союз үрдүнэн уонна Саха сиригэр физико-математическай хамсааһын инициатора, саҕалааччыта буоларын тоһоҕолоон бэлиэтээтилэр.
Российскай Федерация уопсай үөрэхтээһинин бочуоттаах үлэһитэ, СР үөрэҕириитин туйгуна, Михаил Андреевич үөрэнээччитэ, дьоҕурдаах оҕолору өйүүр улуустааҕы Фонда тэрийээччитэ Анна Васильевна Слепцова эдэр ыччат техническэй үөрэххэ тардыһарыгар анаан, былырыын М.А. Алексеев төрөөбүтэ 100 сылыга, фонда тэриллибитин иһитиннэрдэ. Физикаҕа, математикаҕа, техническэй хайысхаҕа араас олимпиадаларга, научнай-практическай конференцияларга үрдүк ситиһиилэрдээх оҕоҕо бу фонда стипендия аныыр. Стипендиаты улуустааҕы үөрэх управлениетын иһинэн хамыыһыйа быһаарар. Быйылгы стипендия И.Л. Кондаков аатынан Бүлүүтээҕи гимназия 11 кылааһын туйгун үөрэнээччитигэр Иванова Заидаҕа анаммытын туоһулуур сертификаты туттарда.
Гимназия 8 кылааһын үөрэнээччитэ «Космос далёкий и близкий» диэн улуустааҕы интеллектуальнай турнир кыайыылааҕынан тахсан, Амурскай уобаласка баар «Восточнай» космодромҥа барарга улуус баһылыгын сертификатын ылбыт Владислав Христофоров тыл эттэ.
ССРС Народнай учуутала Михаил Андреевич Алексеев аатын үйэтитэргэ кини боруонсаттан оҥоһуллубут пааматынньыгар сибэкки тыыннаах дьөрбөтүн уурдулар. Улуу учуутал сырдык аатын махталлаах үөрэннээччилэрэ, Бүлүү дьоно-сэргэтэ хаһан да умнубаттар уонна инникитин даҕаны кини төрөөбүт күнүгэр ити курдук бу сквергэ мустан үтүө тылынан ахтан-санаан ааһыахтара.
Ааптар: Николай ФЕДОРОВ.
