Бүлүү улууһугар алын сүһүөх кылаас уонна саха тылын, литературатын учууталларын семинардара

Олунньу 27 күнүгэр Олоҥхо Дьиэтигэр ыытыллыбыт Бүлүү улууһун алын кылаас уонна саха тылын, литературатын учууталларын «ФГОС ирдэбилинэн кылаас таһынааҕы дьарыктар оҕону иитиигэ-үөрэтиигэ суолталара» диэн тиэмэлээх семинарга уопсайа 35 педагог кыттыыны ылла.

Улуустааҕы саха тылын уонна литературатын учууталларын методическэй холбоһуктарын салайааччыта, Бүлүүтээҕи гимназия саха тылын  учуутала Томская В.П. өрөспүүбүлүкэтээҕи “Саха тылын, литературатын уонна култууратын үөрэтии кэмпэриэнсийэтин сүрүн ис хоһооно уонна тутула” диэн ааттаах бастакы сүбэ мунньахха кыттыбытын, онно киирбит этиилэр, санаалар тустарынан кэпсээтэ.

В. Каратаев аатынан Бүлүүтээҕи Олоҥхо Дьиэтин дириэктэрэ Степанова Т.П. Олоҥхо Ассоциациятын үлэтин сырдатта. Олоҥхо ыһыаҕын туһунан тахсыбыт кинигэлэри билиһиннэрдэ.

Бүлүүтээҕи үөрэх салалтатын начальнигын солбуйааччы Филиппова Н.А. учууталлар ыйытыыларыгар сиһилии хоруй биэрдэ, төрөөбүт төрүт тылы үөрэтэр үлэлэригэр ситиһиини баҕарда.

Алын сүһүөх кылаас учууталлара кылаас таһынан үлэни хайдах тэрийэллэрин, уус-уран айымньыны оҕо умсугуйан ааҕарын көҕүлүүр туһунан, уруокка оонньуу түһүмэхтэрин хайдах киллэриэххэ сөбүн ыйдылар.

Барыта 24 киһи тыл эттэ, уопут атастаста.

Семинар түмүгүнэн улуустааҕы үөрэх салаатыгар маннык этиилэр киирдилэр:

  1. Саха оскуолатыгар нууччалыы тыллаах, эбэтэр нуучча оскуолатыгар үөрэммит оҕо кэлэр түбэлтэтигэр, саха тылын үөрэтии программатын ирдэбилин чопчулуурга. 9-с уонна 11-с кылаастарга түмүктүүр үлэни (промежуточнай аттестацияны) ханнык ыйаахха олоҕуран туттарары быһаарарга.
  2. Е.А. Степанова аатынан Тоҕус гуманитарнай-эстетическэй гимназиятын уопутагар олоҕуран, орто сүһүөх кылаастарга (5-8 кыл.) улуустааҕы төрөөбүт тыл уонна литература олимпиадатын ыытыыны Бүлүүтээҕи үөрэх салалтатын былааныгар киллэрэргэ.
  3. Улуустааҕы «Инникигэ хардыы» НПК-ҕа саха филологиятын салаатыгар дакылаат тезиһин нууччалыы, английскайдыы суруйарга, ыйытыыга хоруйдуурга сөбүлэһэн туран, үлэни (дакылааты) сахалыы суруйары, көмүскүүрү көҥүллүүргэ.
  4. Электроннай пособиелары, методическай хомуурунньуктары оҥорон таһаарыы.

Добавить комментарий

Ваш e-mail не будет опубликован. Обязательные поля помечены *