Олунньу 22 күнэ — «Учитель – профессия мужская» республиканскай күрэх
- Эн тоҕо учуутал идэтин талбыккыный?
- Советскай (Российскай) армияҕа сулууспалыы сылдьыбыт кэмңиттэн ордук өйдөөн хаалбыт түгэниң?
- Уол оҕону иитиигэ эн тугу сүбэлиэң этэй?
Макаров А. С., Бүлүү гимназиятын химияҕа учуутала
- ЯГУ биолого-географическай факультетыгар научнай үлэһиттэри бэлэмнииллэр. Мин специальнаһым – биолог, научнай үлэм «Грызуны». Ол гынан баран, дьонум кыамматтарынан, дойдубар кэлбитим. Бүлүү гимназиятыгар биолог-химик буоларым быһыытынан, бастаан биологияны, кэлин 25 сылга химияны биэрэн кэллим. Учуутал үлэтэ төһө да уустугун иһин, оҕону иитиигэ 1970 сылтан баччааҥҥы дылы үлэлээн кэлбиппиттэн кэмсиммэппин. Оҕолор дьылҕаларыгар үчүгэй өттүттэн көмө буолбут буоллахпына, идэбин сөпкө талбыт эбиппин диэн саныам.
- Сэбиэскэй аарымыйаҕа сулууспалаабатаҕым. Доруобуйабына сыыйыллыбытым. Көрдөспүтум даҕаны ыыппатахтара.
- Мин бэйэм 3 уол оҕону иитэн атахтарыгар туруордум диэхпин сөп. 10 сиэннээхпин, онтон 4 уол. Тугу сүбэлиэм этэй, аҕаларга? Уол оҕону 10 сааһын ааһыар диэри үлэҕэ сыһыарыахха, аҕа төһө да бокуойа суох буоллар, уол оҕоҕо кини сабыдыала хайаан да наада. Уол кыра эрдэҕиттэн өтүйэни, сүгэни, быһаҕы туттар, эрбииннэн сатаан эрбиир, өтүүк, плитка, лампа кыра өрөмүөнун оҥорор буолаҕа улааттаҕына туһалыыр. Аны эт-хаан өттүнэн дэгэттэр сайдыылаах буолара өссө үчгэй. Ол туһугар бэйэтигэр сөп түбэһэр спорт көрүҥүнэн дьарыктанара ордук(волейбол, баскетбол, теннис, легкай атлетика, атах оонньуута, тустуу бокса уо.д.а.). Оҕо 13-14 сааһыттан аҕатын кытта бииргэ сылдьара өссө ордук (оттооһун, бултааһын, балыктааһын, сир аһын хомуйуу, хонуктаах походтар, массыынан өрөмүөнэ, диэ таһыгар кыра тутуулар уо.д.а.). Уопсайынан сүрэхтээх үлэһит киһи хаһан да өлөн-охтон биэрбэт. Үчүгэй киһи буолар. Аҕалар ону ситиһэ сатыахтаахпыт.
Васильев С.И., Тааһаҕар орто оскуолатын дириэктэрэ
- География уруогун ордук сөбүлүүрүм. Туризымынан дьарыктыыллар этэ.
- 1974 с. Забайкальскай военнай уокурукка Ленин орденын туттарбыттара. Оборона миниистирэ Гречко кэлэ сылдьыбыта. Читаҕа Песчанкаҕа Л.И. Брежнев сулууспалаабыт танковай батальонугар казармата баара. Оччолорго Даманскай арыылардааҕы событиелар кэннилэриттэн КНР биhигини «Враг №1» дииллэрэ. Ол иhин ЗабВОну күүhүрдүбүттэрэ. Союзка саамай улахан военнай округ буолбута.
- Оскуолаҕа уhуйааннары күүскэ сайыннарыахха. «Саха сатаабатаҕа суох» диэн тыыңңа иитиэххэ. Туохтан да толлон турбакка тугу эмит тобула сатыыр, төбөтүгэр буhарар гына талаанын сайыннара сатыахха. Өбүгэ төрүт үгэстэригэр: булка-алка, балыкка, үлэҕэ-хамнаска, оттуур-мастыыр курдук сиэри-туому тутуhар, сэбин-сэбиргэлин бэйэтэ оңостор буолуохтаах.
Корякин А.В., Бүлүү гимназиятын физкультураҕа учуутала
- Миигин бэрт кыра эрдэхпиттэн ийэм хара үлэҕэ уhуйбута, үөрэхтээх буоларбытыгар баҕарара. Эдьиийбиттэн хаалсымаары үөрэхпэр кыhалларым. Биhиги саҕана, мин санаабар, учуутал саамай үрдүк таhымнаах, бары өттүнэн туhалаах испиэссиэлиис диэн сыаналыырым…
- Үс сыл Чуумпу акыйаан муоратааҕы флотугар сулууспалаабыппын, төhө да ыарахаттардааҕын иhин, барытын күндүтүк саныыбын, саҕаланыаҕыттан бүтүөр диэри чахчы ЫТЫК ИЭСПИН толорбутум…
- Уол оҕо ордук, үөрэҕи кытта сэргэ, дэгиттэр сайдыылаах, чахчы да кыанар, тулуурдаах, дьулуурдаах, ыарахаттартан толлубат уонна чиэhинэй ЭР ДЬОН буолалларыгар баҕарыам этэ.
Раев А.В., «Солнышко» оҕо уһуйаанын иитээччитэ
- Аҕам аймахтарыгар элбэх учуутал идэлээх дьоннор бааллар, кырдьаҕас өттө ВПУ-ны бүтэрэн салгыы үрдүк үөрэҕи ылбыттара. Кинилэр миэхэ мэлдьи холобур буолаллар.
- Төрөппүттэргэ уол оҕону иитиигэ сүбэм: чөл олоҕу тутуhуу, төрүт аhы аhааhын, күннээҕи режими тутуhуу, төрөөбүт тылы тэңңэ нуучча, омук тылын үчүгэйдик билиини ситиhии. Кыра сааhыттан оҕону үлэҕэ, ааҕыыга, айылҕаны харыстааhыңңа уhуйуу.
Тонгоесов А.П., Чернышевскай орто оскуолатын математикаҕа учуутала
- Математиканы интэриэhиргиир этим, оскуолаҕа сылдьан оҕолору кытта үлэлиир этим.
- Боевой гранатанан сыал быраҕыыга биир уол предохранителин түhэрэн граната эстибитэ.
- Спордунан дьарыктаныы, режими кытаанахтык тутуhуу, улахан дьон сүбэтин истэ уонна толоро үөрэнии.
Воронов П.Г., Чернышевскай орто оскуолатын муусукаҕа учуутала
- Үүнээр көлүөнэни ырыа кэрэ эйгэтигэр иитээри, төрөөбүт дойдутун таптыырга, айылҕатын харыстыырга үөрэтээри
- Присяга биэрбит долгутуулаах кэми өйдөөн хаалбыппын уонна аан бастаан Т-62 танканы ыыппыт кэммин.
- Уол оҕону саха төрүт культуратыгар сыhыаран иитиэххэ наада, булка, куйуурга, сиргэ-уокка, айылҕаҕа илдьэ сылдьан.
Барахов В.А., Чернышевскай оскуолатын химияҕа, биологияҕа учуутала
- Оскуолаҕа үөрэнэр сылларбар биология уруогун сөбулуур этим, ол иhин ЯГУга БГФга үөрэнэ киирбитим.
- Элбэх омук уолаттарын кытта доҕордоспуппун.
- Спордунан утумнаахтык дьарыктаналлара инники армияҕа сулууспалыылларыгар туhалыа дии саныыбын.
Протопопов В.В., Чернышевскай орто оскуолатын ОБЖ учуутала
- Олус наадалаах идэ диэн санааттан.
- Омук оҕолоро албыннааhыны, уорууну олох сөбүлээбэттэр, армия эппиэтинэскэ, режимцэ, ырааска барытыгар үөрэтэр үчүгэй оскуола.
- Үлэҕэ үөрэтии, спордунан дьарыктаныы, төрөөбүт Ийэ дойдуну, дьону-сэргэни убаастыыр буолуу.
Винокуров Ю.И., ВОСОШ дириэктэрэ
- Мин аймахтарбар эр дьон өттө бары учуутал идэлээхтэр, ученайдар бааллар. Идэбин таларбар кинилэр уонна ытыктыыр учууталларым Ирина Егоровна, Мотрена Николаевна сабыдыаллара улахан этэ.
- Уол оҕо кыра сааhыттан аҕатын үтүө холобуругар иитиллэн, уhуйуллан улаатар. Дьиэ кэргэңңэ аҕа оруола үрдүктүк тутуллуохтаах.
Попов Л.Н., Г.С. Донской аатынан 2-с № Бүлүүтээҕи орто оскуола физкультураҕа учуутала
- Эн үлэң тумугэ – норуоппут дьылҕата үйэттэн үйэҕэ, дойдубут сайдыыта буолар. Учуутал идэтэ уустук, ол эрэн, бочуоттаах улахан махталлаах. Кыра сылдьан эдьиийбин, бырааппыт кытта учууталлаах оонньуурбут. Мин наар физкультура учуутала буолааччыбын.
- 1999-2001 сыллаахха Хабаровскай кыраай Сосновка бөhүөлэккэ ракетнай войскаҕа сулууспалаабытым. 3 сыл устата өйдөөн хаалбыт түгэним элбэх. Онтон биирэ ОФП результатын үчүгэйдик туттаран отпускаҕа дойдубар кэлэн барбытым. Дьиэбэр барарбын истэн үөрүүм үгүс этэ. Дойдубуттан күүс-уох, сэниэ эбинэн, үөрэн-көтөн төттөрү сулууспалыы бартым.
- Уол оҕону иитиигэ аҕа буоларым быhыытынан үлэҕэ, бултуу-алтыы барарга аттыгар илдьэ сылдьыахха наада. Эн хайдах тутта-хапта, саңара-иңэрэ, дьону кытта сыhыаннаьаргыттан оҕоң элбэҕи билэр-көрөр, үөрэнэр. Аҕата хайдаҕын көрөн улаатаппыт оҕо инникитигэр холобур буола оңостор.
